Heiden Harm

Galgenberg en Heiden Harm

Bron:d'Eigenspraok juni 2021 door Marcel van Berkum

In sommige dörpen en steden he’j de naam Galgenberg. Zo ok in Sillevold. An de Ulfseweg tussen Korenweg enen Heuvelstraot heit het gebied Galgenberg. Zoas meestal hef de naam te maken met de geschiedenis van dén plek. Vrogger was door een heuvel en door baovenop hef een galg gestaon. De Galgenberg was de gerichtplaats van de ‘Hoge heerlijkheid Sillevold en Varsseveld’. Zo heel vrogger wazzen ze niet zachtzinnig in het uutvoeren van liefstraffen zoas geselen, brandmerken, vebranden, wurgen, onthoofden en ophangen. Dat was vrogger een vemakelek gericht en gezicht veur het volk. In dörpen en steden he’j ok volksvehalen, die aover en aover zun deurveteld en vaak veschillende versies kent. In Sillevold geet het vehaal dat Heiden Harm de letste was dén op de Galgenberg deur de strop an zien end is gekommen. Is het woor? Maor och, mik dat uut? Het is een mooi vehaal. Heiden Harm was een roverhoofdman. Hi-j zol in de Achterhoek met zien bende begin 1800, toen ons land bezet was deur de Fransen, hebben huus gehollen. Volges het vehaal was hi-j een soort Robin Hood, dén van de rieken stal en dat an de armen gaf. Hi-j vestoppen zich met zien bende in holen in de Vennebulten bi-j Heelweg. Door laefden zi-j van aovervallen en wat hi-j aoverhiel, gaf hi-j an arme luj. Op een zondagmargen wol Harm de bewoners van een boerderi-j beroven. Maor door wazzen allenig een jonge boerin en eur kind thuus. Harm beslaot heur niks te doon. Hi-j bleef zelfs op de koffie en nao een tiedje vetrouwden ze mekaar. De boerin vetelde dat zi-j nog naor de kerk wol en vrog of Harm een hötje op eur blaag wol passen. Zi-j gong echter niet naor de kerk, maor naor de gendarmen en verraojen Harm. De gendarmen kreggen ‘m te pakken en hi-j gaf zich aover. Harm zol toen gezeg hebben: “Gespöld en veloren.” Nao een proces van twee waeken wed hi-j veroordeeld töt de strop en in optoch naor Sillevold gebrach. Daor ston de letste galg in de wieje umgeving. Hi-j wed terechgesteld veur völ publiek. Sommigen wollen zo een stille hulde brengen an de man met een ruwe bolster en blanke pit. Effen later is de galg in Sillevold afgebraoken. 

SilvoldePediA
Ulftseweg 26
7064 BD Silvolde
tel. 0315-342600 of 06-2300 3204
E-mail: robbiew52@gmail.com